教學電子報第 19
發行人:楊思偉、丘周剛  策劃總編:林欣怡  主編:江宛蓁

 100年度優良數位教材獲獎心得

台語的原住民課

台灣語文學系 楊允言老師 

 

教學除了是付出,猶閣有真濟部份是分享、記錄家己佮成長。

我是新進老師,來到這个大家庭才第二冬,雖然毋是菜鳥仔老師,總是面對新的環境,猶是有誠大的衝擊。一方面阮兜猶佇中央山脈彼一爿,定定逐禮拜往回,轉去花蓮的時,看山看海、享受清氣的空氣、𤆬囡仔、處理家庭沓沓滴滴事項,來到學校,早早來晏晏走、教學、行政、佮學生盤撋、做袂煞的講義;另外一方面,對理工科轉來文科,對華語上課到台語上課,面對的情景嶄然仔無仝。

「台灣原住民族及其歷史」是台語系的選修課,當然,我第一擺上。一開始,我將家己的接觸原住民的經驗搜搜出來,鄒族、Kavalan、卑南族的部落,閣有Saisiat矮靈祭、Amis豐年祭、富里東里的Siraya尪姨、,加上熟似的原住民朋友,閣有接觸過的原住民文學,先催排這門課的主菜佮配菜。

這幾年新的族名一直出現,所以一寡我認為適合做教科書的冊,攏有一寡佮現狀無符合的情形。經過思考,我以原民會佮教育部合編的「台灣原住民族歷史語言文化大辭典」(http://citing.hohayan.net.tw/default.asp)做主要的上課教材。無影音來輔助,逐家可能較會睏去,所以我上網揣Youtube頂面相關的影音,閣利用圖書館視聽資源「請問貴姓」(真不幸,絞歹一台光碟機,閣賠一塊DVD還圖書館,毋過純粹意外)、「認識平埔族」,幾冬前佇史前博物館買的「原知原味」嘛提來做教材。

既然是台語系開的課,所以用台語上課,要求學生用台文交作業是基本原則,當然,老師愛做好模樣,所以,教學投影片用台文。這的確愛開袂少時間,嘛因為按呢,佇學校的日子,通常是求真樓猶未開就入來,等到操場的電火禁起來了後才離開。

有一寡語詞需要揣出台語按怎講,「小米」台語是「稷仔sik-á」,「黥面」台語是「刺面」,「女巫師」台語是「尪姨」,這部份是塊整理講義的時,相對愛開較濟時間的所在。其實,咱看一寡原住民相關語詞佇終戰前後的變化,親像「獅設」變做「賽夏」,「曹」變做「鄒」,「芝苑」變做「姬望」,嘛通了解著佇終戰前,佇漢字使用,台語是有主體性的,這个主體性佇華語入來了後一點一滴無去。

我閣提台灣教會公報(亞洲發行上久的報紙)1888年用台語羅馬字描寫大庄事件的文章,看彼當時非官方、活潑生動的民間書寫。

本成有想欲校外教學,予同學實際感受原住民文化,總是我想著的點攏佇東部,路途迢遠,開錢傷重,所以尾仔無辦。學期中,我拄好有機會參加原住民族語教學訪視的機會,遮的經驗嘛變做上課的素材。另外,較偏政治社會的原住民議題,包括原住民正名、還我土地運動,都市原住民,無法度正名的Siraya等等。

感謝學校設優良教材獎,感謝台語系開這門課,嘛感謝修課的同學,不管恁是因為感覺這門課較好過抑是真正佮意這門課。嘛感謝台三甲許雅婷同學,伊有協助我整理這份講義。

這門課上完了後,台灣電影「賽德克巴萊」造成轟動,原住民電影「不一樣的月光」嘛來上演,若是2012年春天閣會當開這門課,上課會當討論的題材變閣較濟,可惜因為選修課開課數量的制限,暫時無法度閣開。希望另日開會成這門課,咱做伙來熟似台灣原住民。 

ps: 這篇分享文以台文書寫,因為如果用華文,我的學生會以為不是我寫的。如果您會台語,讀讀看,也許讀得懂,如果讀不懂,有兩個方法,一是把不懂的語詞,丟到教育部台灣閩南語常用詞辭典查詢,會得到發音以及中文解釋,另一個方法,2012年春來修或旁聽台語系開的台語文習作。 

 

 

 南湖大山大約在台中和花蓮的交界處,17年前,我曾穿著「為了子孫不要核電」的T恤站上山頂,背景是中央尖,那次穿雨鞋完成北一段,遇到兩次靈異事件,在馬比杉山頂看到太平洋,心裡震動了一下。當時在台北工作,後來移居花蓮享受山海,現在到了台中,人生有許多不可預知,生命得以更加豐富。

 

 這是修課同學的作業,台語寫的哦!